小妹係新界西北長大,家住元朗,見住新界乜乜雞地、鴨地、爛地變身為豪宅;好多山旮旯新樓盤,早兩年開售賣到萬七、八蚊呎,買家仲好似執到寶咁。好幾個樓盤「關鍵日期」都係今年尾,上咗車嘅業主,分分鐘好似金融海嘯時,輸到某些富豪入廠嘅金融產品Accumulater,因為最終都會「I Kill You Later」。
自從長實「做衰仔」面對現實,蝕住都肯賣黃竹坑南岸Blue Coast,樓市掀起劈價潮。BlueCoast 呎價劈至兩萬蚊邊,呢個價幾年前只係買到新界樓咋。長實港島劈完再殺入新界劈,洪水橋#LYOS狠劈三成,真係刀刀見血(註:係見業主嘅血)。
其他發展商見狀亦加入戰團搶客。早兩個月新地(0016.HK)在元朗YoHo Hub II 期,手起刀落折實呎價$1.5萬,記得兩年前YoHo Hub I 期平均賣$1.9萬一呎,真係「遲買平兩球」。
![早兩個月新地在元朗YoHo Hub II 期,手起刀落折實呎價$1.5萬。](https://www.huthk.com/wp-content/uploads/2024/06/35f39fd0-2410-11ef-bed7-fb454c64a183.jpg)
YoHo Hub位置配套算成熟,有商場又係元朗站上蓋,買貴咗業主都可以守到下,但新地如此劈價就有個「ripple effect」,散去到下一個站錦上路嘅大型樓盤Grand MayFair柏瓏,呢個樓花盤2022年底一Q賣咗1300伙,呎價去到$1.7萬,以信置(0083.HK)為首財團套現$123億,今年底就係關鍵日期了。如果買家唔係樓花期即供,到收樓先至揾銀行估價,分分鐘要抬錢先上到會,撻釘的話又可能有手尾。長實巳預警會向洪水橋滙都撻訂買家追收差價,咁…..其他發展商又會否照跟呢?所以早兩年上車買咗新界樓,當時以為平咗,點知上會時先至「 I Kill You later」。
![柏瓏2022年底一Q賣咗1300伙,呎價去到$1.7萬,以信置為首財團套現$123億。](https://www.huthk.com/wp-content/uploads/2024/06/d8169510-2410-11ef-9de9-a717c82a7f37.jpg)
新界樓升得遲跌得早
新界樓等如二、三線股票,升得遲又跌得早。歷史係不斷重演嘅,九十年代長實發展嘉湖山莊,是一代炒家嘅「英雄塚」。已故「新界王」發叔劉皇發亦損手,同長實掃入成幢,差啲「責死」。而一貫「尊重合約精神」嘅長實,同樣向嘉湖撻訂買家追收差價。現時香港樓市,如果有decumulator 買的話,我都落叠。話口未完,長實同新地在大欖樓盤飛揚又來劈價,最多劈近三成,真係血流成河。