最近樓價大跌，但又適逢銀行加息，所以好多人都熱議究竟呢個時候係咪應該買樓？但係有網民喺香港討論區發文，話有朋友明明有層樓，但用嚟出租，自己另外租屋住，樓主百思不得其解，咁做有乜嘢好處……大家又點睇呢？
樓主對於朋友嘅雙租做法，好睇唔透：「係咪有錢人先會咁做？我朋友自己原本有層樓佢最近搬咗，以為佢賣咗之前層樓，原來係佢自己層樓租咗畀人，然後自己再租樓住……唔係好明點解會咁做，係咪而家租樓仲抵過自住？自己有層樓先要諗住邊度好，冇咩事我都係返去痴屋企人住算！」
結果引來網民熱烈回應，原來好多人都係咁做：「我都係咁，自己嗰層租比人，現時暫租，就仔仔返學」、「我都係咁，方便返工」，亦有網民有朋友都有相同做法：「我朋友都係咁，佢話方便返工喎，又唔想一買一賣俾手續費同印花稅」、「方便子女入名校」、「我家姐就係咁，因為佢層樓多鬼佬租，租金收入較高，之後佢租一個大少少既（嘅）單位，但租金平D」、「自己屋唔夠大例如多咗細路要搬大D，又或者公司有HOUSING都可以」。
網友認為為咗搬入好嘅校網，方便子女入名校同返學，呢個雙租情況好普遍。
出去租一手樓 貴管理費業主包埋
其他網民亦紛紛表示呢個做法都有各樣好處：「租自己個單位，再（租）個（過）個平啲個單位住，例如村屋，夠交租之如（餘），重可以幫補生活費！！」、「自己樓嘈租比人，再去租其他靜，好正常」、「見好多都係多個細路唔夠住，又或者要校網好就變左（咗）雙租」、「自己新樓租比（畀）人吸疼（氡）氣幾年，醒目！」、「雙租好common，因為大小/校網。如果自住間屋比較舊，出去租新樓甚至一手樓仲有so，貴貴管理費業主包埋。」
網民認為將自置物業出租，再租過間平啲嘅屋，隨時有賺。
